Dərmanların bir çox faydaları və zərərləri haqqında məlumatı onların klinik sınaqları zamanı əldə edirik. Lakin bu klinik sınaqlarda yalnız əsaslı surətdə seçilmiş bir neçə yüzdən bir neçə minə qədər insan iştirak edir. Dərman preparatı yalnız uzun müddət ərzində çoxlu sayda pasiyent tərəfindən qəbul edildikdən sonra onun təsirləri, xüsusilə nadir hallarda meydana çıxan təsirləri daha aydın olur. Nadir hallarda meydana çıxan təsirlər barədə məlumatın verilməsi dərman vasitələrinin təhlükəsizlik profilinin səciyyələndirilməsi üçün xüsusilə vacibdir. Önəmli məqamlardan biri də ondan ibarətdir ki, insanlar dərmanlara fərqli cür reaksiya verir, çünki hər bir kəs üçün genetika, digər xəstəliklər, allergiya, sosial vəziyyət, psixologiya və s. ilə bağlı olaraq müxtəlif risk amilləri mövcuddur. Biz hər bir xəstəni zərərə qarşı nəyin həssas etdiyini, zərərin nə zaman baş verdiyini bilməliyik. Bu məlumatları gələcəkdə dərmanların necə istifadə olunacağına təsir edəcək biliklər toplusuna əlavə etmək lazımdır.